棚工墮斃遺八旬雙親 恩橡基金助解燃眉急 (Headline Daily)

Executive日記

本月初一名四十幾歲嘅搭棚工喺油麻地疑安全繩斷裂，不幸墮樓身亡，遺下八旬雙親，境況堪憐。一直致力改善長者健康嘅恩橡基金會，幾個董事主動伸出援手，合捐十萬元，找Kelly幫忙交給兩位老人家，小妹即刻搵星島慈善基金，聯絡之後，終於把款項交到兩老手上，解生活燃眉之急。Kelly希望兩老節哀順變。

死者陳兆豐，任職搭棚工二十幾年，同八十多歲高齡嘅父母同住土瓜灣一個公屋單位，佢係家中嘅經濟支柱。陳媽透露，兒子係一個孝順仔、管家仔，由於自己行動不便，煮唔到飯，仔仔收工後會買外賣畀兩老。諗起過往點滴，陳媽聲淚俱下，坦言難以接受仔仔離世嘅事實，仲透露由屋企前往最近嘅車站，需要經過兩大條樓梯，但雙腿無力，近十年冇出過門，提到佢可能連仔仔嘅葬禮都無法出席，佢話︰「好難過，自己個仔都送唔到」，但陳爸陳媽覺得今生有個孝順仔，值得驕傲。

基金會營運總監黃端華指，該會二○一四年由多位基督徒專業人士成立，致力改善長者健康、福祉，為長者提供吞嚥障礙治療，同時推動跨代共融。近兩年疫下，佢哋了解到不少長者欠缺支援，有向長者派發防疫物資包等支援服務。

頭條日報